بن علي يعود من خلال المدرسة العليا للإقتصاد الرقمي

بن علي يعود، نعم اول ظهور لبن علي في مؤسسة حكومية و تحديدا في المكتبة متاع المدرسة العليا للإقتصاد الرقمي بمنوبة، إيه نعم فالمكتبة مازال عندهم كتاب علي
 بن علي و كتاب شنية عاد، قليك يا سيدي كتاب حقوق الإنسان و الحريات العامة في فكر الرئيس بن علي، إيه نعم ب حقوق الإنسان و الحريات العامة و خلي عاد في فكر شكون؟؟ في فكر الرئيس بن علي.
مالا وينكم إنتوما راهو فكر بن علي، اقوى مفكر و بطل العالم في حقوق الإنسان. اما بيرجولية الحادثة هاذي مايلزمهاش تتعدى هكاكة، لا و موجود في اربع نسخ معناها حضور لافت و اكثر شوية من لافت.
و كيما قالو ناس قبل خوذ العلم من ريوس الفكارن و فكر بن علي في مكتبتنا يزيد من حريتنا

الزيتون هو والله الحل

مالا قلتولي سي المعطر قال إلي اصحاب الشهائد العليا يمشو يجمعو الزيتون، إييه عاد شبيه حل قوي برشا من اقوى وزير في اقوى
حكومة، و هوما صرفو صرفو إكملو يعملولنا إجازة عليا في جني الزيتون إختصاص زيتون اكحل، و هاككا ماعادش إنحيرو في جني الزيتون كيف يبدا عالي بما إنو الشهادة باش تكون عالية، و بالمناسبة ان إحب إنسلم على لطفي زيتون و إنقلو برا شاخت عندك بعد زيتونة تڢ هاو ولات عندك إجازة كاملة و إنشاء الله العام ديما صابة

حالة وفاة ثانية بمرض حمى غرب النيل في ولاية قبلي

زوز وفيات اكاهو؟؟ تي هاو شوية؟؟ برجولية العدد يلزمو يزيد باش هكاكا انكونو حققنا هدف من اهداف الثورة و الي هو الصحة للجميع، لا سامحوني نقصد الموت للجميع. بلادنا للوراء سر و شوية اخر باش تلقونا في نفس مستوى بلدان افريقيا الوسطى مع كامل احترماتي ليهم. و بعد الطاعون و  حمى غرب النيل هانا نستناو في كارثة ما اكبر.و بينتنا انا عرفت السر وين الحكومة عملت حساب انو 11 مليون تونسي برشة و قالت علاش لا ميوليوش 5 ولا 6 و هكاكا بانقص خبزة وبانقص قلق و مطالب إجتماعية إلي هي حق من حقوق كل تونسي. و تويكا عادي جدا تسمع الي فما جمرة خبيثة و جنون البقر و ممكن زاده مرض من القرن15. و تو مالاخر يا وزارة الصحة شوفلنا حل راهو الشعب شنع...

عاجل : البنتاغون

عاجل : البنتاغون : طائرة حربية إيرانية أطلقت النار على طائرة أمريكية بدون طيار فوق مياه الخليج

ها امريكيا الحنانة ايران تفدلك معاك، وغلاوتك وراس بوعمامة تفدليك، تي يا بنتي حبوا يفجعو الطيارة في بالهم فيها طيار،ياخي طلعت قرعة. على كل حال ماتتغشيش و ابعثي المرة جاية طيارة فيها شوية مارينز.

رفيق عبد السلام مشا لخليج ڨابس في بالو الطيارة طاحت غادي